mater dei

Description

Minn informazzjoni li għandha l-kamra tal-aħbarijiet ta' Media Link Communiċations jirriżulta li fil-qasam tas-saħħa kienu approvati mill-Uffiċċju tal-Prim Ministru numru kbir ta' transfers politiċi, kemm għal infermieri u anke għal professjonisti ohra. Jidher ukoll li saru transfers lil diversi Pulizija. Numru ta' infermiera li minn dejjem taw is-servizz tagħhom fl-Isptar Mater Dei u li ilhom is-snin jaħdmu fl-ispeċjalitajiet partikolari tagħhom, mit-Tnejn intalbu jirrappurtaw għax-xogħol fl-Isptar Monte Carmeli. Dan ifisser li l-Isptar Mater Dei u l-pazjenti se jkunu tilfu s-servizzi ta' dawn il-professjonisti li issa se jitqabbdu jagħmlu xogħol totalment differenti minn dak li jispeċjalizzaw fih. Hemm imbaghad min, għall-kuntrarju, qed jiġi aġevolat abbażi tal-kulur politiku tiegħu. Każ partikolari li seħħ fl-aħħar sigħat huwa dak tad-Departmental Nurse Manager tal-sptar Monte Carmeli, li mit-Tnejn ġie trasferit lura fl-Isptar Mater Dei. Dan bil-konsegwenza li l-Isptar Monte Carmeli issa jinsab mingħajr Departmental Nurse Manager. Qed isiru wkoll transfers politiċi oħra f'setturi differenti fil-qasam tas-saħħa. Fl-Isptar Ġenerali t'Għawdex qed jissemma wkoll ċaqliq ta' uffiċjali tas-sigurtà. Il-kamra tal-aħbarijiet ta' Media Link Communications hi infurmata wkoll li kienu appuntati diversi Nursing Officers li ngħataw din il-kariga bla ma ħarġet sejħa għall-applikazzjonijiet. Dan qed isir bi ksur tar-regolamenti tal-Kummissjoni għas-Servizzi Pubbliku. Dawn it-transfers politiċi juru li minkejja l-għajta ta' qabel l-elezzjoni tal-Partit Laburista ta' 'Malta Tagħna Lkoll', il-Partit Laburista baqa' bl-istess politika tas-snin '70 li meta jieħu l-poter jaqbad u jagħti transfers lil ħaddiema Nazzjonalisti. Normalment, id-deployment fil-qasam tas-saħħa kien isir meta jkun hemm tibdil ta' xi sistema u għalhekk it-transfers kienu isiru ta' grupp ta' ħaddiema f'daqqa u mhux skont il-kulur politiku tagħhom, bħalma jidher li qed isir illum. Jirriżulta wkoll li fil-qasam tas-saħħa qed jintużaw prattiċi ta' bullying f'pożizzjonijiet għolja fil-management. Fil-Korp tal-Pulizija ukoll saru diversi transfers politiċi fejn qed ikunu aġevolati Pulizija Laburisti. Sorsi fid-Depot qalu lill-kamra tal-aħbarijiet ta' Media Link Communications li fil-mira tat-tmexxija l-ġdida hemm l-Għassa tal-Ajruport, fejn inqalgħu diversi kuntistabbli u surġenti. Saru transfers lejn għases li kien ilhom xhur magħluqa, fosthom lejn l-Ghassa ta' Ħad Dingli.